ប្រពៃណីចិនមុន​ចូលឆ្នាំថ្មីចាំបាច់ត្រូវតែធ្វើរឿងទាំងនេះ ដើម្បីមានលាភចូលផ្ទះ!!!

ភ្នំពេញ​:មុន​ពិធីបុណ្យ​ចូលឆ្នាំ​ចិន​ឈាន​មកដល់​ម្តងៗ​គេ​ឃើញ​បងប្អូន​ជនជាតិ​ចិន​ក្នុងនេះ​មិន​ថា​ជនជាតិខ្មែរ​ខ្សែស្រឡាយ​ចិន​រស់នៅ​ប្រទេស​កម្ពុជា​ទេ គេ​តែងតែ​មានការ​សម្អាតផ្ទះ​សម្បែង​និង​ពិសេស​មានការ​តុបតែង​លម្អ​យ៉ាង​ស្រស់ស្អាត​ដើម្បី​ទទួល​ស្វាគមន៍​ឆ្នាំ​ថ្មី​ដែល​គេ​ជឿថា​នឹង​នាំមក​នូវ​សិរី​មង្គល ជួយ​បង្កើន​ជោគ​សំណាង​ដល់​ខ្លួន​។​

~


​ ​
​គួរបញ្ជាក់​ថា​ពិធី បុណ្យចូលឆ្នាំ ប្រពៃណី​ចិន នា​ឆ្នាំនេះ​នឹង​ឈាន​មកដល់ ថ្ងៃទី​១១ ដល់ ថ្ងៃទី​១៤ ខែ កុម្ភៈ ឆ្នាំ ២០២១​។​សម្រាប់​ថ្ងៃទី​១១​ខែកុម្ភៈ​គឺជា​ថ្ងៃ​សែន​ជីដូន​ជីតា ហើយ​៣​ថ្ងៃ​ទៀត​គឺជា​ថ្ងៃបុណ្យ​ចូលឆ្នាំថ្មី​ដែល​ឆ្នាំ​ចាស់​ឆ្នាំ​កណ្តុរ​ផ្លាស់ ឆ្លង​ចូលឆ្នាំ​ឆ្លូវ​ឬ​ជា​ឆ្នាំ​គោ​វិញ​។​

~

​ពាក់ព័ន្ធ ក្នុង​រឿងនេះ លោក បណ្ឌិត ជា មុនី​ឬ​ទ្ធី ប្រធាន សមាគម អ្នកស្រាវជ្រាវ​វឌ្ឍនភាព​កម្ពុជា​-​ចិន បាន​បញ្ជាក់​ប្រាប់​រស្មី​កម្ពុជា​ឱ្យដឹងថា ទម្លាប់​នៃ​ការរៀបចំ​ផ្ទះសម្បែង​ក៏ដូចជា​តុបតែង គេហដ្ឋាន​​អបអរសាទរ​​​​​ឆ្នាំ​ថ្មី​មិន​ត្រឹមតែ​ជនជាតិ​ចិន​ទេ​គឺ​ជនជាតិ​ដទៃ​ក៏​គេ​តែង​អនុវត្ត​វិធី​នេះ​ដូចគ្នា​។​ការរៀបចំ​ផ្ទះសម្បែង​មិន​ក្រៅពី​ទទួល​ស្វាគមន៍​ឆ្នាំ​ថ្មី​ទេ ប៉ុន្តែ​គេ​ក៏មាន​ជំនឿ​ពី​ការទទួល​នូវ​សិរី​សួស្តី​ឆ្នាំ​ថ្មី​និង​ការជូន​ពរជ័យ​ពី​ទេវតា​ឆ្នាំ​ថ្មី​ផងដែរ​។​


~

​ប្រធាន​សមាគម​អ្នកស្រាវជ្រាវ​វឌ្ឍនភាព​កម្ពុជា​-​ចិន រូបនេះ​បានបញ្ជាក់​ប្រាប់ថា ”​នៅក្នុង​ការ​ដុសលាង​សម្អាតផ្ទះ​សម្បែង​និង​ការតុបតែង​លម្អរ​ផ្ទះ​ឬ​អ្នកខ្លះ​ថែមទាំង លាបថ្នាំ​ផ្ទះ​ថ្មី ក៏ដូចជា​បិទ​ក្រដាស​នានា​នោះ​ក្រៅពី​ដើម្បី​ទទួល​ឆ្នាំ​ថ្មី​ហើយ ពួកគាត់​នៅមាន​ជំនឿ​នាំមក​នូវ​សេចក្តីសុខ និង​ចម្រុងចម្រើន​ដល់​ក្រុមគ្រួសារ​របស់ខ្លួន​”​។​

~

​លោក​ថា ជន​ជាតិចិន​ចូលចិត្ត​បិទ​រូប​ឬ​ក្រដាស​សិរី​សួស្តី​ជា​ពណ៌​ក្រហម​ពីព្រោះថា​ជា​ពណ៌​គេ​មាន​ជំនឿ​នាំមក​ជោគ​សិរី​សួស្តី​។​ក្រៅពីនេះ​ពណ៌​នេះ​នៅ​ជួយ​កម្ចាត់​ឧ​ប​ទ្រព្យ​ចង្រៃ​ឱ្យ​ចៀស​ចេញ​ឆ្ងាយ​ផង​។​


​​

~

​ទាក់ទិន​ទៅនឹង​បុណ្យចូលឆ្នាំថ្មី និង ជំនឿ​ជនជាតិ​ចិន​នេះដែរ លោក បណ្ឌិត ជា មុនី​ឬ​ទ្ធី បានឱ្យដឹង​បន្ថែមថា​សម្រាប់​ទស្សនៈ​ជនជាតិ​ចិន​តែង​ជឿជាក់​៣​យ៉ាង​ក្នុង​ការតុបតែង​ផ្ទះសម្បែង​ពណ៌​ក្រហម​នេះដែរ​គឺ ទី​១​ជួយ​បណ្តេញ​ឧ​ប​ទ្រព្យ​ចង្រៃ និង​ពិសេស​នាំមក​ជោគ​សិរី​សួស្តី​វិញ​។​ទី​២​ព្យួរ​ផាវ​ពណ៌​ក្រហម​ពីព្រោះថា​សម្លេង​ផ្ទុះ​របស់​ផាវ​បណ្តេញ​សត្វ​កាច​សាហាវ និង​ខ្មោច​ព្រាយ​បិសាច​ចេញ​ឆ្ងាយ និង​ទី​៣​គេ​ដុត​បំភ្លឺ​ទាន​ឬ​គោម​រយៈពេល​៣​ថ្ងៃ​ដោយ​មិន​ទុកឱ្យ​ងងឹត​ដើម្បី​កុំឱ្យ​សត្វ​កាច​សាហាវ ឬ​ព្រាយ​បិសាច​មិន​ហ៊ាន​មក​ក្បែរ​។​

~

​ពាក់ព័ន្ធ​ក្នុង​ប្រពៃណី​បុណ្យចូលឆ្នាំ​ចិ​នេះដែរ​លោក​បណ្ឌិត ជា មុនី​ឬ​ទ្ធី ប្រធាន​សមាគម​អ្នកស្រាវជ្រាវ​វឌ្ឍនភាព​កម្ពុជា​-​ចិន​បានឱ្យដឹង​ដែរ​ថា​ក្រៅពី​ការតុបតែង​ផ្ទះសម្បែង​ចេញ​ជនជាតិ​ចិន​ក៏​មិន​ភ្លេច​ទិញ​ចំណីចំណុក​សម្រាប់​ត្រៀម សែន ជីដូន ជីតា ក្នុងការ​នាំមក​ជោគ​សំណាងល្អ​ទៀតផង​។​
​ដោយឡែក​បើតាម​ការស្រាវជ្រាវ​នៃ ឯកសារ ចិន​វិញ​បង្ហាញថា​ជនជាតិ​ចិន​តែង​ចូលចិត្ត​តុបតែង​ក្រដាស​ពណ៌​ក្រហម​នានា​តាម​ផ្ទះសម្បែង​ដែល​គេ​មាន​ជំនឿ​ពី ឥទ្ធិពល និង​ភាពស្រស់ស្អាត​ក្នុង​ថ្ងៃបុណ្យ​ចូលឆ្នាំថ្មី​។​

~

​សម្រាប់​ជំនឿ​របស់របរ​សំខាន់ៗ​ដែល​គេ​តែង​ប្រើ​យកមក​តុបតែង​ផ្ទះ​ទាំងនេះ​រួមមាន​៖

១)​គោម​ពណ៌​ក្រហម​
​គោម​ពណ៌​ក្រហម​គេ​ជឿជាក់ថា​តែង​ជួយ​បណ្តេញ​រាល់​ឧបទ្រពចង្រៃ​ឱ្យចេញ​ឆ្ងាយ​ពី​ផ្ទះសម្បែង​។​ក្រៅពីនេះ​ជនជាតិ​ចិន​នៅ​ធ្វើ​ការព្យួរ​គោម​ពណ៌​ក្រហម​ក្នុង​រថយន្ត​ដែល​គេ​ជឿជាក់ថា​នៅ​ជួយ​ការពារ​គ្រោះភ័យ​និង​បណ្តេញ​រាល់​អំពើអាក្រក់​ឱ្យ​ចាកចេញ​ឆ្ងាយ​។​

~

២)​ដើម​ក្រូចខ្វិច​(​ផ្លែ​ពណ៌​ក្រហម​)
​ផ្លែក្រូច​ពណ៌​ក្រហម​មានន័យ​ទៅដល់​មាស​និង​ជោគ​លាភ​។​ក្រៅពីនេះ​ដោយសារ​ក្រូច​ពណ៌​ប្រភេទ​នេះ​មាន​ពណ៌​ដូច​មាស ដែល​បញ្ជាក់​ពី​ទ្រព្យសម្បត្តិ​ទើប​វា​បាន​ក្លាយជា​របស់​និម្មិត​រូប​ទៅដល់​ការ​មានទ្រព្យ​មានសំណាង​និង​ជោគ​លាភ​។​តាម​ជំនឿ​ហើយ​សម្រាប់​ក្រូច​ប្រភេទ​នេះ​គេ​អាច​ទិញ​ទាំង​ដើម​មក​តុបតែង​ផ្ទះសម្បែង​និង​ទិញ​ផ្លែ​មក​សែនព្រេន​ក៏​នឹង​ទទួលបាន​ផល​ដូចគ្នា​។​

៣)​រូបសំណាក​និម្មិត​រូប​ប្រចាំឆ្នាំ​កំណើត​
​រូបសំណាក​ប្រចាំឆ្នាំ​ក៏​ជា​របស់​សំខាន់​មួយទៀត​ដែល​គេ​តែង​ទិញ​មក​តុបតែង​ផ្ទះសម្បែង​សម្រាប់​សិរី​មង្គល និង​នាំ​ជោគ​លាភ​មកឱ្យ​។​ក្នុងនេះ​ដូចជា​ឆ្នាំកុរ​ជា​និម្មិត​រូប​សត្វ​ជ្រូក​គេ​តែង​ទិញ​រូបសំណាក​សត្វ​ជ្រូក​មក​ដាក់​ផ្ទះ​ដែល​បញ្ជាក់​ពី​សិរី​មង្គល​និង​ភាពសំបូរ​សប្បាយ​ជាដើម​។​

៤)​ផាវ​ពណ៌​ក្រហម​
​ជន​ជាតិចិន​ភាគច្រើន​ចូលចិត្ត​អុជ​ផាវ​នៅក្នុង​ថ្ងៃបុណ្យ​ចូលឆ្នាំ​ចិន ដើម្បី​បណ្តេញ​ឧ​ប​ទ្រ​ចង្រៃ​ឱ្យ​ចាកចេញ​ឆ្ងាយ​។​ទោះបីយ៉ាងណា​ក្តី​ដោយសារ​ផាវ​នាពេល​បច្ចុប្បន្ន​គេ​បាន​ហាម​ប្រាណ​មិនឱ្យ​អុជ​បង្ក​សម្លេង​ក្តុងក្តាំង​បន្តទៀត​នោះ ទើប​បច្ចុប្បន្ន​គេ​ឃើញ​មាន​ការផលិត​ផាវ​ស​ម្ប​និម្មិត​មក​តាំង​លម្អរ​ផ្ទះ​ជំនួស​វិញ​។​ការតាំង​បង្ហាញ​ផាវ​ស​ម្ប​និម្មិត​ជំនួស​ការដុត​នេះ​ក៏​គេ​ជឿជាក់ថា​នឹង​ទទួលបាន​នូវ​ជោគ​លាភ​និង​ទទួលបាន​ផល​ល្អ​ដូចគ្នា​នឹង​ការអុជ​បំផ្ទុះ​ផាវ​ពិត​ផងដែរ​៕

~


ប្រភព៖រស្មីកម្ពុជា

Leave a Reply

Your email address will not be published. Required fields are marked *

error: ❌ហាមដាច់ខាតការយកអត្ថបទ ពីវេបសាយនេះដោយគ្មានការអនុញាត⛔